ໃນຕອນບ່າຍ ຂອງວັນທີ 14 ກຸມພາ 2019 ທີ່ຫ້ອງປະຊຸມ ພຊສ ຫຼວງພະບາງ ພາຍໃຕ້ເປັນປະທານ ຂອງ ສະຫາຍ ຈັນທະວົງ ຜົນນະຈິດ, ເລຂາຄະນະພັກ ພຊສ, ທ່ານ ຄໍາຈັນ ໂຄດໄຊ, ຮອງເລຂາຄະນະພັກ ພຊສ, ເລຂາໜ່ວຍພັກບໍລິຫານ-ແຜນການ-ຈັດຕັ້ງ, ທ່ານ ຂັດຕິຍະ ວັນນະສັກ, ຄະນະພັກ ພຊສ, ປະທານກວດກາພັກ, ສະຫາຍ ແສງເພັດ ຮຸ່ງດວງຈັນ, ເລຂາໜ່ວຍພັກທີ່ດິນ ພ້ອມດ້ວຍບັນດາສະມາຊິກພັກສົມບູນ ເຂົ້າຮ່ວມຢ່າງພ້ອມພຽງ.
ສະຫາຍ ນາງ ເກສອນ ມີໄຊບົວ, ຫົວໜ້າຂະແໜງຈັດຕັ້ງ ແລະ ພະນັກງານ ໄດ້ຂື້ນຜ່ານ ມະຕິຕົກລົງ ຂອງຄະນະປະຈໍາພັກແຂວງ ເລກທີ 01/ຄປພຂ.ຫຼບ ວ່າດ້ວຍການຮັບເອົາມະຫາຊົນຜູ້ກ້າວໜ້າເຂົ້າເປັນສະມາຊິກພັກສຳຮອງ ແລະ ເລກທີ 02/ຄປພຂ.ຫຼບ ວ່າດ້ວຍການເລື່ອນສະມາຊິກພັກສໍາຮອງຂື້້ນເປັນສະມາຊິກພັກສົມບູນ, ລົງວັນທີ 16 ມັງກອນ 2019 ໃນນີ້ ມີ ສະມາຊິກພັກສຳຮອງເລື່ອນຂື້ນເປັນສະມາຊິກພັກສົມບູນ ທັງໝົດ 4 ສະຫາຍ (ຍິງ 3 ສະຫາຍ), ມະຫາຊົນຜູ້ກ້າວໜ້າເລື່ອນຂື້ນເປັນສະມາຊິກພັກສຳຮອງ 2 ສະຫາຍ (ຍິງ 1 ສະຫາຍ), ຈາກນັ້ນ ສະຫາຍ ຈັນທະວົງ ຜົນນະຈິດ, ເລຂາຄະນະພັກ ພຊສ ໄດ້ໃຫ້ຄຳໂອ້ລົມ, ແນະນຳ ຕໍ່ ບັນດາສະມາຊິກພັກໃຫມ່ ໃຫ້ສືບຕໍ່ເຝິກຝົນຫຼໍ່ຫຼອມຕົນເອງ, ເປັນແບບຢ່າງໃນການປະຕິບັດໜ້າທີ່, ປະຕິບັດລະບຽບຂອງພັກປະຊາຊົນປະຕິວັດລາວ, ກົດໝາຍຂອງລັດ. ກຳແໜ້ນທາດແທ້, ຫຼັກການພື້ນຖານ ຂອງພັກ ເພື່ອເປັນແນວທາງໃນການຈັດຕັ້ງປະຕິບັດວຽກງານຂອງຕົນ ໃຫ້ສຳເລັດຜົນ.